अर्घाखाँची ।
लुम्बिनी प्रदेशस्तरीय पत्रकार आचारसंहिता प्रशिक्षक प्रशिक्षण कार्यक्रम अर्घाखाँचीको भालुवाङमा सम्पन्न भएको छ । यही पुस ७ र ८ गते सम्पन्न उक्त कार्यक्रममा पत्रकार आचारसंहिता, भाषाको प्रयोग, व्याकरणीय शुद्धाशुद्धी र यसको कार्यान्वयन सम्बन्धमा प्रशिक्षण दिइएको थियो ।
प्रेस काउन्सिल नेपालको आयोजना र नेपाल पत्रकार महासङ्घ लुम्बिनी प्रदेशको संयोजनमा भएको कार्यक्रममा प्रेस काउन्सिल नेपालका सदस्य तथा नेपाल पत्रकार महासङ्घका अध्यक्ष गोविन्द आचार्यले पत्रकार आचारसंहिता २०७३ को २०७६ असोज ६ गते संशोधनसहित जारी गरिएको बताउनुभयो ।
कार्यक्रममा नेपाल पत्रकार महासङ्घ लुम्बिनी प्रदेश समिति अध्यक्ष मौसम रोकाले पत्रकारले आफूले आफैँलाई समीक्षा गर्नुपर्ने समय आएको बताउँदै तथ्यपरक पत्रकारितामा ध्यान दिन आग्रह गर्नुभयो ।
काउन्सिलका सदस्य तथा नेपाल पत्रकार महासङ्घका अध्यक्ष गोविन्द आचार्य, पत्रकार महासङ्घका उपाध्यक्ष विपुल पोखरेल र काउन्सिलका प्रमुख प्रशासकीय अधिकृत झबिन्द्र भुसाल प्रशिक्षक रहेको उक्त कार्यक्रममा प्रेस काउन्सिल नेपालका मिडिया अनुगमनकर्ता विपुल पाण्डेले फरक–फरक कार्यपत्र प्रस्तुत गर्नुभएको थियो ।
कार्यक्रमको प्रशिक्षक प्रशिक्षण सत्रमा पत्रकार किरण कौशलले लुम्बिनी प्रदेशको पत्रकारिता क्षेत्रमा कोभिड–१९ ले पारेको प्रभाव र त्यहाँको पत्रकारिता र पत्रकारको अवस्थाबारे कार्यपत्र प्रस्तुत गर्नुभएको थियो ।
प्रतिक्रिया :