प्रेस काउन्सिल नेपालले पूर्व अध्यक्ष सुरेन्द्र प्रसाद सिंहको निधनमा श्रद्धाञ्जली व्यक्त गर्न शोकसभा गरेको छ । गत फागुन १८ गते निधन भएका सिंह काउन्सिलमा २०४७ देखि २०४८ सम्म अध्यक्ष हुनुहुन्थ्यो । २०५२ सालमा सर्वोच्च अदालतका प्रधानन्यायाधीश हुनुभएका सिंहले काउन्सिलमा अध्यक्ष रहँदा प्रेस स्वतन्त्रता र अभिव्यक्ति स्वतन्त्रताको निमित्त खेल्नुभएको भूमिकाको स्मरण गर्दै काउन्सिलका कार्यवाहक अध्यक्ष गोपाल बुढाथोकीले विगतको इतिहास र अग्रजको योगदानको कदर गरिने बताउनुभयो ।
१३ औँ दिनको तिथिमा आयोजित शोकसभामा बोल्दै उहाँले सिंहको निधनले प्रेस काउन्सिल परिवार शोकाकुल बनेको भन्दै शोकसन्तप्त परिवारमा धैर्यधारणका लागि समवेदना प्रकट गर्नुभयो । कार्यवाहक अध्यक्ष बुढाथोकीले काउन्सिलको सातौँ अध्यक्ष सिंहको महत्त्वपूर्ण योगदान रहेको र गौरवपूर्ण इतिहासलाई स्मरण गर्दै अग्रजको सम्मान गर्नु कर्तव्य हुने उल्लेख गर्नुभयो । कार्यक्रममा काउन्सिलका प्रमुख प्रशासकीय अधिकृत झबिन्द्र भुसालले शोकलाई शक्तिमा बदलेर काउन्सिलको श्रीवृद्धीका लागि उहाँको मार्गदर्शन पछ्याइरहने उल्लेख गर्नुभयो । शोकसभामा सिंहको कार्यकालमा कार्यरत रहनुभएका काउन्सिलका कर्मचारी हर्कबहादुर श्रेष्ठले उहाँको कार्यशैली कर्मचारीमैत्री भएको स्मरण गर्नुभयो । सिंह लामो समय सरकारी सेवामा सेवारत रही सर्वोच्च अदालतका न्यायाधीशका हैसियतमा काउन्सिलको अध्यक्ष भएकाले पनि उहाँ कर्मचारीको हक अधिकार र सेवासुविधाप्रति सकारात्मक भएको उहाँले स्मरण गर्नुभयो ।
शोकसभामा काउन्सिल पूर्व सदस्य चेतनाथ धमला लगायत काउन्सिलमा कार्यरत सम्पूर्ण कर्मचारीले सिंहप्रति श्रद्धाञ्जली व्यक्त गर्नुभएको थियो । सिंहको निधनको शोकमा काउन्सिलले आज १३ औँ दिनमा आधा दिन कार्यालय बन्द गर्ने निर्णय गरेको छ ।
प्रतिक्रिया :