काठमाडौं/श्रम, रोजगार तथा सामाजिक सुरक्षामन्त्री रामेश्वर राय यादव प्रेस काउन्सिल पुगी कार्यवाहक अध्यक्ष किशोर श्रेष्ठसँग भेटघाट एवं छलफल गर्नुभएको छ ।
केही मिडियाले अफवाह फैलाइएको भन्दै आवश्यक कारबाहीको लागि उहाँ आफैँ काउन्सिल पुग्नुभएको हो । भेटमा मन्त्री यादवले आरोप पुष्टि गर्न नसके गैरजिम्मेवार मिडियामाथि कडा कारबाही हुनुपर्ने धारणा राख्नुभयो ।
पत्रकार आचारसंहितासम्बन्धी विषयमा केन्द्रित छलफलमा उजुरी, कारबाहीबारे जिज्ञासा राख्नुभएको थियो । सो अवसरमा उपप्रशासकीय अधिकृत रामशरण बोहराले आचारसंहिता उल्लंघनको प्रकृति, कारबाही प्रक्रियाबारे जानकारी गराउनुभयो । मन्त्री यादवको तर्फबाट उपसचिव सुरेश राउतले एक अनलाइनविरुद्ध गत भदौ २१ गते उजुरी दर्ता गराउनुभएको थियो ।
सो अवसरमा प्रेस काउन्सिल सदस्य खिलबहादुर भण्डारी र प्रमुख प्रशासकीय अधिकृत झबिन्द्र भुसाल सहभागी हुनुहुन्थ्यो ।
रिपोर्ट: महेन्द्रराज सिंह, २०७७ असोज २ गते शुक्रबार ।
प्रतिक्रिया :